Brayza: TRIPP Cənubi Qafqazda dayanıqlı sülh üçün zəmin yarada bilər

“Beynəlxalq sülh və rifah naminə Tramp marşrutu” (TRIPP) Cənubi Qafqazda uzunmüddətli və dayanıqlı sülh üçün zəmin yarada bilər. Bunu ABŞ-nin Azərbaycandakı keçmiş səfiri Metyu Brayza Bakıda keçirilən CAMCA Regional Forumunda çıxışı zamanı bildirib.

Onun sözlərinə görə, ABŞ və region ölkələri TRIPP-in inkişafına investisiya yatırmaqda maraqlıdır.

“ABŞ TRIPP-ə üzv ölkələrlə birlikdə marşrutun şərqdə Mərkəzi Asiyaya, qərbdə isə Azərbaycan ərazisindən Naxçıvana və Türkiyəyə qədər genişləndirilməsi üçün investisiyaların inkişaf etdirilməsinə sadiqdir”, –  Brayza qeyd edib.

O bildirib ki, təxminən 42 kilometr uzunluğunda olacaq marşrut avtomobil və dəmir yollarını, fiber-optik rabitəni və elektrik enerjisi xətlərini əhatə edəcək.

Brayza TRIPP-in Ermənistanı regional iqtisadiyyata inteqrasiya etməklə iqtisadi qarşılıqlı asılılıq yaradacağını və sülhə töhfə verəcəyini vurğulayıb.

Keçmiş səfir ABŞ Prezidenti Donald Trampın Azərbaycan və Ermənistan arasında sülh prosesinə şəxsən cəlb olunduğunu və bunun prosesə siyasi çəki qazandırdığını bildirib.

Aytac