Dünya Bankı: Ermənistan əhalisinin təxminən üçdə ikisi yoxsul və ya həssas qruplardadır

Ermənistan əhalisinin təxminən üçdə ikisi yoxsul və ya həssas qruplara daxildir, yoxsulluq əsasən kənd yerlərində cəmləşib. Bunu Dünya Bankının Azərbaycan üzrə ölkə meneceri Roland Prays Bakıda keçirilən CAMCA 2026 Regional Forumunda çıxışı zamanı deyib.

Onun sözlərinə görə, Ermənistan və Gürcüstanda iqtisadi artım əsasən paytaxtda və yüksək bacarıq tələb edən İKT və maliyyə sektorlarında cəmləşib. Orta təhsildən yuxarı təhsili olmayan və ya aşağı məhsuldarlıqlı və qeyri-rəsmi məşğulluqda qalan işçilər üçün keyfiyyətli iş yerlərinin yaradılması əsas çağırış olaraq qalır.

Prays bildirib ki, Gürcüstanda əhalinin 46%-i gündə 8,3 ABŞ dollarından az vəsaitlə yaşayır.

“Azərbaycan həqiqətən karbohidrogenlərə diqqət yetirir, digər ölkələrdə isə əhəmiyyətli artım var, lakin yoxsulluğun azaldılması hələ də problem olaraq qalır”, -  o qeyd edib.

Onun sözlərinə görə, region ölkələri üçün uzunmüddətli əsas çağırış daha çox investisiya və məhsuldarlığın təmin edilməsi, iqtisadiyyatın yeni artım mənbələri hesabına şaxələndirilməsi və insanlar və biznes üçün daha yaxşı imkanların yaradılmasıdır.

Aytac Zeynalova