“Xınalıq və Köç yolu” qoruğunun hüquqi statusu müəyyənləşib

 

 

2021-2024-ci il müddətində Qubanın Xınalıq kəndində ümumilikdə  60- a yaxın evin tikilərək təhvil verilməsi planlaşdırılır. Bunu qoruqların idarə etmə mərkəzinin əsas tikinti sektorunun müdiri Elşən Ağalarov  anews.az-a açıqlamasında bildirib. 

O vurğulayıb ki, 2021- ci ildə 16,  2022-ci ildə isə 11 ev bərpa  olunaraq, əhaliyə təhvil verilib.
 
"Bu il 20 evin tikintisinə başlanılıb və il ərzində 17 evin təhvil verilməsi planlaşdırılır",- sektor müdiri Dövlət Turizm Agentliyi ilə BMT-nin İnkişaf Proqramının birgə həyata keçirdiyi "Azərbaycanın Regionlarında Dayanıqlı Turizmin İnkişafına Dəstək" layihəsi çərçivəsində təşkil olunan tədbirdə deyib.

Elşən Ağalarovun sözlərinə görə, 2024-cu ildə 18 evin tikilməsi nəzərdə tutulub. 

"Bu ilin noyabrın 20-ə qədər hava şəraiti imkan versə, evlər sakinlərin istifadəsinə veriləcək",- o əlavə edib.

2023-cü ilin sentyabrın 4-də Prezident İlham Əliyevin sərəncamı ilə Agentliyin tabeliyində "Xınalıq və Köç yolu" Dövlət Tarix Mədəniyyət və Etnoqrafiya Qoruğu yaradılıb. Yeni qoruq Xınalıq kəndini və 6 rayonun ərazisindən keçən, 200 km-dən çox uzunluğu olan Köç yolunu əhatə edir. Sentyabrın 18-də isə Birləşmiş Millətlər Təşkilatının Elm, Təhsil və Mədəniyyət üzrə ixtisaslaşmış qurumu UNESCO-nun Ümumdünya İrs Komitəsinin 45-ci sessiyasında "Xınalıq və Köç yolu mədəni landşaftı"nın qurumun Ümumdünya irs siyahısına daxil edilməsinə dair qərar qəbul olunub.