Üç ayda Türkiyəyə 9,2 milyonturist səfər edib

2026-cı ilin yanvar–mart aylarını əhatə edən ilk rübdə Türkiyənin turizm sektoru artım tempini qoruyub saxlayıb. Ölkəyə gələn xarici turistlərin sayı ötən ilin eyni dövrü ilə müqayisədə 4,2 faiz artaraq 9,2 milyona çatıb. Turizm gəlirləri də yüksələrək 9,9 milyard ABŞ dolları səviyyəsində qeydə alınıb.

Türkiyənin mədəniyyət və turizm naziri Mehmet Nuri Ersoy İstanbulda keçirdiyi mətbuat konfransında 2026-cı ilin ilk üç ayına dair göstəriciləri açıqlayıb. Nazir bildirib ki, bu dövrdə həm turist sayında, həm də turizm gəlirlərində sabit artım müşahidə olunub.

Rəsmi məlumatlara əsasən, ilin ilk rübündə turizm gəlirləri 9 milyard 896 milyon ABŞ dollarına çatıb ki, bu da ötən ilin analoji dövrü ilə müqayisədə 4,2 faiz artım deməkdir.

Ersoy qeyd edib ki, dünya hazırda həssas və dəyişkən bir mərhələdən keçir. Regional gərginliklər, geosiyasi proseslər və münaqişələrin yaratdığı mənfi təsirlər beynəlxalq səyahət axınlarında dalğalanmalara səbəb olur və bu da turizm sektoruna birbaşa təsir göstərir.

“Bölgəmizdə böhranlar hər zaman olub və bundan sonra da olacaq. Əsas məsələ bu proseslərin necə idarə edilməsidir. Ötən il də oxşar qlobal hadisələr və regional qeyri-müəyyənliklərlə qarşılaşdıq. Buna baxmayaraq, 2025-ci ili 64 milyon turist və 65,2 milyard dollar turizm gəliri ilə başa vurduq. Bu göstəricilər Türkiyənin yalnız güclü turizm istiqaməti deyil, həm də yüksək böhran idarəetmə qabiliyyətinə malik ölkə olduğunu göstərir”, – deyə nazir vurğulayıb.

Nazir əlavə edib ki, Türkiyə bu il də eyni qətiyyət və əvvəlki illərdə qazanılmış təcrübə ilə inkişafını davam etdirir. Onun sözlərinə görə, ilin ilk üç ayında ölkəyə gələn xarici ziyarətçilərin sayı 4,2 faiz artaraq 9,2 milyona çatıb, turizm gəlirləri isə eyni nisbətdə artaraq 9,9 milyard dollara yüksəlib.

Ersoy bildirib ki, rezervasiya tendensiyaları, ləğvlər və turist davranışları davamlı şəkildə izlənilir. Bu isə mövcud vəziyyətin daha dəqiq təhlilinə və bazarlara uyğun çevik addımların atılmasına imkan verir.
Beynəlxalq tədbirlər Türkiyənin turizm cazibəsini gücləndirir

Nazirin sözlərinə görə, Türkiyə, xüsusilə İstanbul, hazırda mühüm beynəlxalq idman və mədəniyyət tədbirlərinə ev sahibliyi edir və yeni iri layihələrə hazırlaşır. Bu cür tədbirlər ölkənin qlobal turizm istiqaməti kimi mövqeyini daha da möhkəmləndirir.

“İstanbul 2027-ci ildən etibarən Türkiyə Qran-Prisi ilə yenidən Formula 1 təqviminə qayıdacaq. UEFA Avropa Liqasının final oyunu isə mayın 20-də İstanbulda keçiriləcək. Şəhərin stadionları və konsert salonları beynəlxalq ulduzların çıxışlarına ev sahibliyi edir. Bu tədbirlərə qatılmaq üçün Avropadan, Rusiyadan, Yaxın Şərqdən və Asiyadan on minlərlə turist Türkiyəyə səfər edir”, – deyə Ersoy qeyd edib.

Nazir vurğulayıb ki, beynəlxalq tədbirlər yalnız idman və incəsənət sahəsi ilə məhdudlaşmır, həm də Türkiyənin qlobal turizm imicinin gücləndirilməsində mühüm rol oynayır.

İlin ilk üç ayında Türkiyədə turistlərin gecəlik orta xərci 2,8 faiz artaraq 102 ABŞ dollarına yüksəlib. Müqayisə üçün bu göstərici 2017-ci ildə 68 dollar, 2025-ci ildə isə 99 dollar olub.

2026-cı ilin ilk rübündə Türkiyəyə ən çox turist göndərən ölkələr arasında Almaniya 678 min ziyarətçi ilə ilk sırada yer alıb. Rusiya Federasiyasından 651 min, Bolqarıstandan isə 539 min turist ölkəyə səfər edib.