ANS PRESS-in məlumatına görə, Makedoniya hökümətinin sərhədi bağlamasına etiraz edən miqrantlar dünən düşərgə yaxınlığındakı  dəmiryolu xətti üzərində etiraz aksiyası keçirib.  Ağır şəraitdə yaşayan düşərgə sakinləri relslərin üzərinə oturaraq, əllərində "biz tədricən ölürük” "insan həyatı pasportdan daha vacibdir” yazılı plakatlar tutub, rəsmi Skopyanın sərhəd qapılarını açmasını tələb edib. 

"Xahiş edirəm, sizə yalvarıram, heç olmasa qadınlara və uşaqlara yazığınız gəlsin. Biz yemək ,içmək istəmirik, sadəcə bizə qarşı insanlıq, humanizm görmək istəyirik.  Qoy bizi insan yerinə qoysunlar”, - etirazçılardan biri deyib.

Hökümət etiraz edən miqrant və qaçqınları başqa bölgələrə köçürmək niyyətindədir. Sərhədin tikanlı məftilləri yaxınlığında 14 minə yaxın miqrant əlacsız vəziyyətdə gözləməkdədir. Bir qədər aralıda yerləşən müvəqqəti düşərgədə isə  artıq miqrant sayı 42 min nəfəri ötüb.

Bu arada Fransanın Kale şəhərində  isə miqrantlar qatı-sağçıların  təzyiqləri ilə üzləşməkdədir.  Dünən qatı-sağçı fəalların keçirdiyi anti-miqrant nümayişindən sonra 14 nəfər saxlanılıb.  Yerli mətbuata görə, icazəsiz aksiya keçirən fəallar, planları  barədə yerli höküməti məlumatlandırmayaraq, 2 körpünü bağlayıb, maşın təkərləri yandıraraq barikada qurmağa çalışıb, miqrantlara qarşı "xaricilər vətəninə qayıtsın” yazılı plakatlar tutub.