Ermənistan MTX-yə ikinci dəfə yeni direktor təyin edildi

Ermənistan milli təhlükəsizlik xidmətinə Armen Abazyan yeni direktor təyin edilib.

Bildirilib ki, Armen Sarkisyanın başqa bir sərəncamı ilə milli təhlükəsizlik xidmətinin direktor müavini, direktor vəzifəsini icra edən Mikael Ambarsumyan tutduğu vəzifədən azad edilib.

Oktyabrın 8-də Armen Sarkisyanın sərəncamı əsasında Arqişti Kərəmyan milli təhlükəsizlik xidmətinin direktoru vəzifəsindən azad olunub. Onun səlahiyyətlərini Mikael Ambarsumyan icra edib.

Yeri gəlmişkən, 2018-ci ildəki hakimiyyət dəyişikliyindən sonra Milli Təhlükəsizlik Xidmətinin rəhbərliyində tez-tez kadr dəyişikliyi olur. Artur Vanesyan 2018-ci il mayın 10-dan 2019-cu il sentyabrın 16-dək xidmətin direktoru işləyib. Keçmiş müavini Eduard Martirosyan ötən il sentyabrın 19-da Artur Vanesyanın istefasından sonra Milli Təhlükəsizlik Xidmətinin direktoru vəzifəsini icra etməyə başlayıb. O, bu il martın 19-da bu vəzifəyə təyin olunmuşdu. İyunun əvvəlində E.Martirosyan tutduğu vəzifədən azad edilib. Onun yerinə 29 yaşlı Arqişti Kərəmyan gətirilmişdi.

Bu baxımdan son bir ayda Ermənistanın Milli Təhlükəsizlik Xidmətində baş verən ikinci dəyişiklikdir.