Rusiya-Ukrayna danışıqlarının DETALLARI

29.03.2022 16:36

Rusiya və Ukrayna arasında danışıqlar konstruktiv keçib. Bunu İstanbulda keçirilən Rusiya-Ukrayna danışıqlarında Rusiyanı təmsil edən nümayəndə heyətinin rəhbəri Vladimir Medinski bildirib.

"Rusiya Ukraynanın təkliflərini nəzərdən keçirəcək, bu barədə Putinə məlumat veriləcək", - o söyləyib.

O qeyd edib ki, Putinlə Zelenskinin görüşü Rusiya və Ukrayna arasında XİN səviyyəsində sazişin paraflanması (ilkin imzalanması, - red) ilə eyni vaxtda mümkün ola bilər.

Ukrayna nümayəndə heyətinin üzvü David Araxamia isə təhlükəsizliyə zəmanətlə bağlı Ukraynanın şərtlərini açıqlayıb. O həmçinin Ukraynanın hansı ölkələrin bu şərtlərin yerinə yetirilməsinə nəzarət etməsiniistədiyini də deyib.

Onun sözlərinə görə, Ukrayna müharibəni dayandırmağa imkan verən Təhlükəsizlik Zəmanəti Müqaviləsi ilə bağlı təkliflərini Rusiyaya təqdim edib. Ukrayna nümayəndə heyəti hesab edir ki, bu, Ukraynanın təhlükəsizliyinə qarant olacaq bütün tərəflərin imzaladığı beynəlxalq müqavilə olmalıdır.

Araxamiyanın sözlərinə görə, Ukrayna Böyük Britaniya, Çin, ABŞ, Türkiyə, Fransa, Kanada, İtaliya, Polşa və İsrailin təhlükəsizliyə qarant durmasını istəyir. Bu ölkələrdən bəziləri artıq razılığını verib.

Araxamiya bildirib ki, qarant ölkələrin qarşılıqlı əməkdaşlığını təmin edəcək effektiv mexanizm də müqavilədə öz əksini tapmalıdır.

" Əslində, bu, NATO Nizamnaməsinin 5-ci maddəsinə ("alyansın bir üzvünə hücum bütün alyansa hücuma bərabərdir", - red) oxşar ola bilər. Əgər Ukraynaya qarşı müharibə, təcavüz və ya xüsusi əməliyyat başlanarsa, o zaman qarant ölkələr üç gün məsləhətləşmələr aparmalı, sonra isə qanuni olaraq Ukraynaya yardım göstərməyə borcludurlar.Amma bu təklif qəbul edilmədi . Biz onu Rusiya tərəfinə verdik. Onların cavabını gözləyəcəyik ”, - Araxamiya deyib.

Bəs Krım və Donbasın taleyi necə olacaq?

Tərəflər Krım və Donbass məsələlərini ayrıca müzakirə etmək barədə razılığa gəliblər. Ukrayna tərəfi belə bir sxem təklif edib.

- Krımın və Sevastopolun statusu ilə bağlı danışıqlar 15 il davam edəcək, tərəflər bu məsələnin həlli üçün silahlı üsullardan istifadə etməyəcək.

- "DNR” və "LNR” adlanan qurumların statusu və taleyi ilə bağlı məsələ ayrıca bənddə yer alacaq, bu məsələ iki ölkənin prezidentləri tərəfindən şəxsi görüşdə müzakirə olunacaq.

- Ukrayna bir sıra ölkələrin aydın və ciddi təminatları olduğu halda qeyri-nüvə ölkəsi statusu və hər hansı hərbi bloka daxil olmayan ölkə statusu ilə razılaşmağa hazırdır.

Sonuncu bənd (bu barədə razılıq əldə olunarsa, - red) faktiki olaraq Ukrayna ərazisində xarici hərbi bazaların və hərbi kontingentlərin yerləşdirilməyəcəyini nəzərdə tutur. Ukrayna heç bir hərbi-siyasi ittifaqlara girməməyi öhdəsinə götürür. Ukrayna ərazisində beynəlxalq hərbi təlimlər yalnız qarant ölkələrin razılığı ilə keçirilə biləcək.

Ukrayna tərəfi bildirib ki, danışıqların növbəti raundu bu gün axşam keçiriləcək. Buna qədər Rusiya tərəfin danışıqların sabah davam edəcəyini bildirirdi.

N.Təbrizli

www.anews.az

Xəbəri bəyəndiniz?

Sosial şəbəkələrdə paylaş