Xankəndində yaşayan ermənilər evlərini kütləvi satışa çıxarıb - FOTOLAR

26.12.2022 15:14

Xankəndidə yaşayan erməni əhalisinin bir çoxu ərazidə tikilən evlərin kütləvi satışına başlayıb.

Elanları yerləşdirilən evlərin qiyməti 20 min dollardan başlayaraq 150 min dollara qədər dəyişir. Elanlarda qiymətlərin bir qismi erməni dramı, bir qismi isə ABŞ dolları ilə yerləşdirilib.

Politoloq Əziz Əlibəyli məsələni şərh edərkən bildirib ki, təhlükəsizlik faktoru səbəbindən Şuşa- Laçın yolunda aksiyalar başladıqdan sonra Xankəndidə ev satışı elanlarının səviyyəsi kəskin şəkildə artıb. Satışa çıxarılan evlərin böyük əksəriyyəti isə tikintisi yekunlaşmamış evlərdir.

"Alıcılar sırasında xarici ölkə vətəndaşlarının olması əsas faktorlardan biridir. Siyahıda əsasən də, Rusiya vətəndaşları öncəlik təşkil edir. Lakin kütləvi şəkildə heç bir ölkə vətəndaşının bölgəyə köçü mümkün deyil”, - politoloq bildirib

Əziz Əlibəylinin sözlərinə görə, mülkiyyətin satışı məsələsində hansı qanunvericiliyə istinad məsələsi ortaya çıxır.

"Qondarma rejimin qanunları Azərbaycan tərəfindən qəbul olunmadığı üçün azərbaycanlıya satış olunarsa, Azərbaycan qanunvericiliyinə istinad olunmalıdır. Bu halda da, satışı edən şəxslər Azərbaycan vətəndaşlığını da qəbul etmiş olar”, - politoloq deyib.

Politoloqun sözlərinə görə, xarici vətəndaşın, o cümlədən qondarma rejimin qanunvericiliyi ilə ev alan ermənilərin mülkiyyət haqqı Azərbaycan qanunvericiliyi tərəfindən qəbul edilmir və həmin şəxslər Xarici İşlər Nazirliyinin qara siyahısına salınır.

"Bundan sonra Azərbaycanın ikitərəfli müqavilə bağladığı ölkələrdə həmin şəxslərin hərəkət imkanları məhdudlaşdırılır. İnterpol tərəfindən həbslərinə sanksiya qoyula bilir”, - Əlibəyli bildirib.

Dekabrın 12-dən başlayaraq bir qrup azərbaycanlı ekoloq Rusiya sülhməramlılarının yerləşdirildiyi ərazidə faydalı yataqların qanunsuz istismarı əleyhinə etiraz aksiyasına başlanılıb. Həmin müddətdə ermənilər azərbaycanlı ekoloqların aksiyasına etiraz olaraq iki dəfə aksiya keçirib. Onların aksiya keçirməsində əsas səbəb Laçın dəhlizinin bağlı olmasına görə ərzaq, yanacaq və digər ehtiyaclardan məhrum olmaq olub.

Bu müddətdə bir sıra beynəlxalq təşkilatlar Azərbaycan tərəfini yolu açmağa çağırıb.

Azərbaycan hökuməti "Laçın dəhlizi”nin Rusiya sülhməramlı qüvvələrinin nəzarəti altında olduğunu vurğulayaraq, Ermənistanın iddialarını təkzib edib.

Rəsmi Bakı bildirib ki, Rusiya sülhməramlılarının nəzarətindəki ərazidə keçirilən aksiya siyasi deyil, ekoloji məqsəd daşıyır və Azərbaycan tərəfi həmin ərazilərdə yaşayan erməni əhalisinə istənilən dəstəyi göstərməyə hazırdır.

Lida Abbaslı

www.anews.az

Xəbəri bəyəndiniz?

Sosial şəbəkələrdə paylaş