Azərbaycan-Serbiya hərbi əməkdaşlığı müzakirə olunub

Azərbaycan və Serbiya Müdafiə Nazirlikləri arasında imzalanmış ikitərəfli hərbi əməkdaşlıq planı çərçivəsində Serbiya Müdafiə Nazirliyinin nümayəndə heyəti Azərbaycana səfərə gəlib.Bu barədə Azərbaycan Müdafiə Nazirliyi bildirib.

Görüş Milli Müdafiə Universitetinin Hərbi İdarəetmə İnstitutunun Hərb Oyunları Mərkəzində keçirilib. Danışıqlarda Azərbaycan və Serbiya arasında müdafiə sahəsində əməkdaşlıq haqqında Saziş, ikitərəfli hərbi əməkdaşlıq planları və strateji tərəfdaşlıq münasibətlərinin gücləndirilməsi mühüm məqamlar kimi vurğulanıb.

Nazirlikdən verilən məlumata görə, qarşılıqlı səfərlər və belə görüşlər hər iki ölkə arasında hərbi əməkdaşlığın daha da inkişafında vacib rol oynayır. Həmçinin, plan daxilində həyata keçirilən təlim‑məşqlərin və tədbirlərin tərəfdaşlığın möhkəmlənməsində əhəmiyyəti qeyd edilib.

Görüşün “Əməliyyatların planlaşdırılması” mövzusunda təqdimatlarla davam etdiyi, müzakirələrin aparıldığı və tərəflərin maraq göstərdiyi sualların cavablandırıldığı bildirilib. Qonaqlara Azərbaycanın müasir ordusunun formalaşması, aparılan islahatlar, planlaşdırma, qoşun növləri, xüsusi təyinatlı təhsil müəssisələri, döyüş hazırlığı və döyüş əməliyyatları üzrə metodologiyalar barədə ətraflı məlumat verilib.

Görüşün sonunda qarşılıqlı hədiyyələr mübadiləsi edilib.