Deputat: Bu il ölkədə sosial müdafiə tədbirləri gücləndirilib

2025-ci ildə Azərbaycanda sosial müdafiə tədbirləri gücləndirilib. Prezidentin sərəncamına əsasən, 76 mindən çox ailəyə birdəfəlik 200 manat yardım ödənib, bu, 335 mindən çox ailə üzvünü əhatə edir. Bunu dekabrın 30-da deputat Vüqar Bayramov Milli Məclisdə çıxışı zamanı deyib. 

"2025-ci ildə həyata keçirilən 5-ci sosial paket 3 milyondan çox vətəndaşı əhatə edib və artımlar üçün 1,4 milyard manat əlavə vəsait ayrılıb. Orta aylıq əmək haqqı ilin sonunda 9,2% artacaq", - o bildirib. 

Bayramov əlavə edib ki, pensiyalar da indeksləşdiriləcək. 1,1 milyon vətəndaşın pensiyası 9,2% artırılaraq yanvardan ödəniləcək, orta pensiya 2026-cı ildə 590 manat, yaşa görə pensiya isə 629 manat olacaq.

Ehtiyac meyarının 300 manata çatdırılması ilə ünvanlı sosial yardımlar da yüksələcək; 900 manat gəlirli 5 nəfərlik ailə üçün orta yardım 600 manata qalxacaq.

Gülnar Nazimqızı