Azərbaycan Bosniya və Herseqovina, Sinqapur vətəndaşları üçün birillik vizasız rejim tətbiq edib

Azərbaycan avqustun 1-dən etibarən Bosniya və Herseqovina və Sinqapur vətəndaşları üçün turizm məqsədli səfərlərdə viza tələbini müvəqqəti ləğv edib.

Dövlət Miqrasiya Xidmətinin məlumatına görə, yeni rejim 2027-ci il avqustun 1-dək qüvvədə olacaq.

Qaydalara əsasən, Bosniya və Herseqovina, eləcə də Sinqapurun ümumvətəndaş pasportuna malik şəxslər göstərilən müddət ərzində Azərbaycana üç dəfə vizasız səfər edə və hər girişdə ölkədə 30 günədək qala biləcəklər.

Məlumata görə, Azərbaycana turizm məqsədindən fərqli səbəblərlə gəlmək və ya ölkədə daha uzun müddət qalmaq istəyən həmin ölkələrin vətəndaşları qüvvədə olan qanunvericiliyə uyğun şəkildə əvvəlcədən müvafiq viza almalı olacaqlar.