Ceyhun Bayramov iranlı həmkarı ilə regional məsələləri müzakirə edib

Azərbaycanın xarici işlər naziri Ceyhun Bayramov BMT Baş Assambleyasının 81-ci sessiyası çərçivəsində iranlı həmkarı Abbas Əraqçi ilə görüşüb.Bu barədə Azərbaycan Xarici İşlər Nazirliyi "X" sosial şəbəkə hesabında məlumat yayıb.

Görüşdə ikitərəfli və çoxtərəfli gündəlik, həmçinin regional proseslər müzakirə olunub.

Nazirlər yüksək səviyyəli təmasların davam etdirilməsinin, qarşılıqlı hörmətin və mehriban qonşuluq münasibətlərinin əhəmiyyətini vurğulayıblar.

Bildirilib ki, Azərbaycan və İran prezidentlərinin 2026-cı ilin avqustunda Bişkekdə keçirilmiş görüşü ikitərəfli əməkdaşlığın genişləndirilməsi istiqamətində mühüm addım olub.

Görüşdə diplomatiya və dialoqun əhəmiyyəti, sülh və sabitliyin təşviqi, eləcə də regional təhlükəsizlik məsələləri barədə fikir mübadiləsi aparılıb.