Mansur Yavaş CHP-dən istefa verib

Ankara Böyükşəhər Bələdiyyəsinin sədri Mansur Yavaş Cümhuriyyət Xalq Partiyasından (CHP) istefa verdiyini açıqlayıb.

Yavaş açıqlamasında bildirib ki, bu gün səsləndirilən bəzi fikirlərə görə CHP üzvlüyündən ayrılıb və siyasi fəaliyyətini müstəqil şəkildə davam etdirəcək.

“Bu gün edilən bəzi açıqlamalar səbəbilə Cümhuriyyət Xalq Partiyasına üzvlüyümdən ayrılır, siyasi yoluma müstəqil olaraq davam etdiyimi ictimaiyyətin diqqətinə çatdırıram”, - Yavaş deyib.

Onun sözlərindən əvvəl CHP sözçüsü Müslim Sarı jurnalistlərlə görüşündə partiyanın institusional kimliyinə zərər vuran şəxslərin CHP-də qala bilməyəcəyini bildirib.

Jurnalistlərin bu fikirlərin Yavaşa aid olub-olmadığı ilə bağlı sualına Sarı “Yavaşı nəzərdə tutmadım, amma heç kim bundan kənarda deyil. Heç kim CHP-dən üstün deyil” cavabını verib.

Yavaş sentyabrın 9-da Türkiyə Prezidenti Rəcəb Tayyib Ərdoğanla Beştəpədə görüşündən sonra da siyasi mövqeyi ilə bağlı açıqlama vermişdi. O, görüş zamanı Ankaranın problemlərinin müzakirə edildiyini bildirib və siyasi gərginliyi artırmaq deyil, azaltmaq məqsədi daşıdığını söyləyib.

Yavaş həmçinin CHP və Yeni Partiya rəhbərliyinin bu mövqeyindən narahat olması halında “lazım olanı etməkdən çəkinməyəcəyini” açıqlamışdı.

Aytac Zeynalova