Deputatlar ümumi pensiya sisteminə keçirilir - İmtiyazlara son

Azərbaycanda fəaliyyətdə olan deputatlar pensiyaya çıxdıqdan sonra pensiyalarının deputat olduqları dövrdəki orta aylıq əməkhaqlarının 80 faizinə çatdırılması qaydasından yararlana bilməyəcəklər.

Milli Məclisin müzakirəsinə çıxarılan qanun layihəsi bu hesablamanı ləğv edərək pensiyanın fərdi hesabda toplanmış kapital əsasında müəyyən edilməsini və vəzifəyə uyğun aylıq əlavə verilməsini nəzərdə tutur.


İndiki qaydaya əsasən, uyğun şərtlərə cavab verən sabiq deputatın pensiyasına onun deputat olduğu müddətdəki orta aylıq əməkhaqqının 80 faizi ilə hesablanmış əmək pensiyası arasındakı fərq qədər əlavə verilir. Parlament sədri, müavinləri və komitə rəhbərləri kimi vəzifələrdə çalışmış şəxslər üçün həmin vəzifələr üzrə maaş əsas götürülür.

Yeni layihəyə görə, pensiya kapitalı əsasında hesablanan əmək pensiyasına əlavə olaraq vəzifəyə uyğun aylıq məbləğ ödəniləcək.

Deputat olduğu müddətin ən azı yarısı qədər sığorta stajı tələbi isə saxlanılır.

Gülnar Nazimqızı