İlham Əliyev MDB ölkələrinin kulinariya festivalını ziyarət edib

Azərbaycan Prezidenti İlham Əliyev oktyabrın 8-də Türkmənbaşı şəhərində keçirilən MDB Ölkələrinin Milli Kulinariya Festivalı ilə tanış olub.

Festival Türkmənistanın 2026-cı ildə MDB-yə sədrliyi çərçivəsində təşkil olunub. Tədbirdə səkkiz ölkə təmsil olunur.

Azərbaycanın Mədəniyyət Nazirliyi və Dövlət Turizm Agentliyinin təşkilatçılığı ilə festivalda ölkənin milli pavilyonu yaradılıb.

Pavilyonda Azərbaycanın milli mətbəxi, müxtəlif bölgələrə xas ərzaq məhsulları və UNESCO-nun Qeyri-Maddi Mədəni İrs Siyahısına daxil edilmiş çay mədəniyyəti təqdim olunub.

Pavilyonun digər hissəsində xalçaçılıq, kəlağayı, misgərlik, ağac üzərində oyma və keramika sənəti nümayiş etdirilib. Burada XIX əsr Qarabağ evinin interyeri də canlandırılıb.

Tədbir çərçivəsində azyaşlı xanəndələrin ifasında Azərbaycan musiqisi və muğam nümunələri səsləndirilib.

Həmin gün Türkmənistan Prezidenti Sərdar Berdiməhəmmədovun adından Türkmənbaşı şəhərində rəsmi qəbul keçirilib və konsert proqramı təşkil olunub. İlham Əliyev qəbulda iştirak edib.