Azərbaycan və Gürcüstan arasında üç ikitərəfli sənəd imzalanıb

Azərbaycan və Gürcüstan arasında gömrük, bitki karantini, bitki mühafizəsi və baytarlıq sahələrində əməkdaşlığı nəzərdə tutan üç ikitərəfli sənəd imzalanıb.

Sənədlər oktyabrın 30-da Gürcüstanın Kaxeti bölgəsinin Siqnaxi şəhərində Azərbaycan və Gürcüstan arasında iqtisadi əməkdaşlıq üzrə birgə hökumətlərarası komissiyanın 11-ci iclası çərçivəsində imzalanıb.

Azərbaycan Dövlət Gömrük Komitəsinin sədri Şahin Bağırov və Gürcüstanın maliyyə nazirinin müavini, Gəlirlər Xidmətinin rəhbəri Mamuka Barataşvili “İpək Yolu - Abreşumis Qza” birgə beynəlxalq avtomobil buraxılış məntəqəsinin praktik fəaliyyətinə dair protokolu imzalayıblar.

Bundan başqa, Azərbaycan Qida Təhlükəsizliyi Agentliyinin sədri Qoşqar Təhməzli və Gürcüstanın Milli Qida Agentliyinin rəhbəri Giorgi Yakobaşvili bitki karantini və bitki mühafizəsi, eləcə də baytarlıq sahələrində əməkdaşlığa dair iki anlaşma memorandumu imzalayıblar.