Ərdoğan İlham Əliyevi Zəfər Günü münasibətilə təbrik edib

Türkiyə Prezidenti Rəcəb Tayyib Ərdoğan Azərbaycan Prezidenti İlham Əliyevə Zəfər Günü münasibətilə təbrik məktubu göndərib.

Ərdoğan məktubunda İlham Əliyevi və Azərbaycan xalqını Zəfər Gününün altıncı ildönümü münasibətilə təbrik edib.

Türkiyə Prezidenti Azərbaycanın qazandığı Zəfərin bütün Türk dünyası üçün qürur mənbəyi olduğunu bildirib.

O, işğaldan azad edilmiş ərazilərin yenidən qurulması və dirçəldilməsi prosesinin sürətlə irəliləməsinin qürurverici olduğunu qeyd edib.

Ərdoğan Şuşa Bəyannaməsi ilə ən yüksək səviyyəyə çatdırılan Azərbaycan-Türkiyə münasibətlərinin bundan sonra da sıx əməkdaşlıq və həmrəylik şəraitində davam edəcəyinə əminliyini ifadə edib.

Türkiyə Prezidenti regionda davamlı sülh, sabitlik və əmin-amanlığın təmin olunması istiqamətində aparılan işlərin Cənubi Qafqazın əməkdaşlıq və inkişaf bölgəsinə çevrilməsinə töhfə verdiyini vurğulayıb.

Ərdoğan məktubunda Azərbaycanın müstəqilliyi uğrunda həlak olan şəhidlərin xatirəsini ehtiramla yad edib, qazilərə minnətdarlığını bildirib.

O, həmçinin İlham Əliyevə cansağlığı və xoşbəxtlik, Azərbaycan xalqına isə firavan və dinc gələcək arzulayıb.