Qurban Qurbanov: "Ən azından hamı oyundan həzz aldı"

"Çox danışmaq düzgün olmaz. Qalib gəlməyi çox istəyirdik. Hər bir futbolçumuzdan razı qaldım. Oyun başlayan kimi bildim ki, bura gələn hər kəs qələbə istəyir. Təəssüf ki, bəzən düşünmədiyin nəticələr olur. Bizə rəqibi təbrik etmək qalır. Avroliqanın "pley-off”unu düşünməliyik”.

Qol.az-ın məlumatına görə, bu sözləri "Qarbağ”ın baş məşqçisi Qurban Qurbanov Çempionlar Liqasının III təsnifat mərhələsinin "Viktoriya” (Çexiya) ilə cavab oyunundan (1:1) sonra keçirdiyi mətbuat konfransında deyib.

- Sizə elə gəlmir ki, Əfran İsmayılovdan sonra əvəzlənmə tamamlanmalı idi?

- Belə düşümürəm. Almeyda özü əvəzlənmək istədi. Rəqib getdikcə daha çox hücum edirdi. Biz əvəzləmə lazım idi. Əvəzləmələrin oyuna mənfi təsir etidiyini düşünmürəm. Oyunun gedişatı bunu tələb edirdi.

- Avroliqanın pley-off oyununa qədər bu üzüntü sizi və bizi buraxacaqmı?

- Futbolda hər bir nəticəyə hazır olmalıyıq. Hamımız bu oyunu unutmalıyıq. İstək daha çox olanda nəticə əldə etmək olur. Bizdə çatışmayan cəhətlərdən biri də odur ki, daima belə azarkeşlər önündə oynamırıq. Daha diqqətli olub, qabağa baxmalıyıq.

- Milan "İnter”i ilə oyundan sonra da "Qarabağ” yıxılmışdı. Hansı daha üzücü oldu?

- Yenidən yıxıldıq. İnamımızı itirməməliyik. Hər bir rəqibə qarşı oynamaq olar. Qistmətimizdə yoxdusa, qalib gələ bilmərik. Ən azından hamı oyundan həzz aldı. Nə "İnter”i, nə də bu oyunu düşünməliyik. 

- Artıq ikinci dəfədir ki, bəxt "Qarabağ”dan üz döndərir. Sizcə, bu qismətlə bağlıdır?

- Bizə qələbə daha vacib idi. Ancaq yəqin ki, qismət belədir.

- Bəlkə, "Qarabağ”ın bu mərhələdə dayanmağı lazımi transferlərin olmamasıdır?

- Ən başlıcası əlimizdə olan futbolçuları qoruyub saxlamalıyıq Özünüz şahidsiz ki, hər legioner bizim oyuna uyğunlaşa bilmir. Çalıçmalıyıq ki, əlimizdə olan futbolçulardan düzgün istifadə edək. Əlbəttə, hər bir komandaya hər il dəyişiklik lazımdır.

- Sizi ən çox məyus edən Miçelin boş qapıya qol vura bilməməsi oldu, yoxsa "Viktoriya”nın qolu?

- Məyusedici şeylər çoxdur. Nəticədə hər ikisi məni məyus etdi.

- Artıq bir neçə ildir ki, Reynaldo paxıl oynayır. Niyə bu problem həll olunmur?

- Reynaldonun qol ötürmələri də az olmayıb. Fikrinizlə tam razı deyiləm. Bəzi epizodlarda hücumçu oyunu öz üzərinə götürməlidir. Ola bilər ki, özü qol vurmaq istəsin. Ancaq hücumçu daha çox qol ötürməsi gözləyir.

- Etiraf etmək lazımdır ki, Premyer Liqamızızn zəif olması bu kimi oyunlarda "Qarabağ”a təsir edir?

- Biz Çexiya və Azərbaycan çempionatlarını bir tuta bilmərik. Amma oyun baxımından elə də geri qalmadıq. Əlbəttə, futbolçunun daha da möhkəm olması üçün daha çətin rəqibə qarşı oynaması lazımdı. Çempionatımız güclü olsa, futbolumuz daha çox inkişaf edəcək. Ümumən, Çexiya və Azərbaycan çempionatları arasında fərq elə də çox deyil.

- Oyunun sonlarına yaxın Elvin Yunuszadə meydana girdi. Bundan sonra rəqib asma ilə qol vurdu. 

- Oyunun gedişi bu əvəzləməni tələb edirdi. Sadəcə, bizim qismətimizdə qələbə yox idi. 

- İlk oyunda da belə hücum futbolu oynamaq olmazdımı?

- Rəqib səfərdə tam fərqli oyun göstərdi. Səfər və ev oyunları həmişə fərqli olur. Səfərdə müdafiəyə daha çox fikir verdik. Rəqibi tanımaq istədik.