Krım tatarlarının taleyi təhlükədədir? - AÇIQLAMA

Ukraynada vəziyyətin gərginləşdiyini deyən S.Əsgəroğlu Krımın taleyinin həll olunmasında Türkiyə faktoruna da toxunub: “Yeni iqtidara qarşı hərəkətə keçən Krım rusları bu əyaləti Rusiyaya bağlamağa çalışacaqlar. Krım tatarlarının buna qarşı çıxması nəticəsində qarşıdurmaların meydana çıxma riskinin artacağı gözlənilir. Beləliklə, milliyyətçi qrupların rusları hədəf ala biləcəyi kimi, Krım tatarlarını da hədəfə ala biləcəyi ehtimal olunur. Bu gərginlik şəraitində Krım tatarlarının bu tərəflərdən birinin yanında iştirak etməsi çox çətin qərar kimi görünür. Krım tatarlarının hər hansı bir tərəfi tutması da böyük risk deməkdir".

Politoloq qeyd edib ki, Krım tatarları hər hansı bir tərəfin yanında yer almaması ən uyğun seçim ola bilər: "Ancaq bu kafi olmayacaq. Krımda yaşanacaq hər hansı bir gərginlik və onun nəticələri Krım tatarlarına təsir etdiyi kimi, Türkiyəyə də təsirsiz ötüşməyəcək. Bu vəziyyətdə Türkiyəyə birbaşa Kiyev rəhbərliyi ilə yanaşı, həm Avropa Birliyi üzərindən, həm də bəlkə də Rusiya ilə icra edəcəyi görüşlərdə Krım tatarlarının təhlükəsizliyinin təmin edilməsi, bölgənin sabitliyinin qorunması mövzusunda hərəkətə keçməsi lazım gələcək".