Keçmiş deputat İlham Əliyevə müraciət edib

30.01.2025 18:22

Bakı Ağır Cinayətlər Məhkəməsində hakim Azər Tağıyevin sədrliyi ilə keçmiş deputat Hüseyn Abdullayevin cinayət işi üzrə məhkəmə prosesi keçirilib, onun ölkə başçısına müraciəti dinlənilib və prokuror 10 il müddətinə azadlıqdan məhrum edilməsini tələb edib.

Hakim məhkəməyə müraciət daxil olduğunu və bu səbəbdən məhkəmə istintaqının yenidən başladığını elan edib. O, həmçinin Hüseyn Abdullayevin Azərbaycan prezidentinə ədalətli məhkəmə araşdırması aparılması üçün müraciət etdiyini bildirib. Həmin müraciətin bir nüsxəsi məhkəməyə təqdim olunub.

"Sizin mənim bu illəri dörd divar arasında necə keçirdiyimdən, hansı əziyyətləri çəkdiyimdən və ailəmin nə qədər əzab çəkdiyindən xəbərdar olduğunuzdan əminəm. Təəssüf ki, haqqımda sizə verilən yalan məlumatlar nəticəsində mən və ailəm bu sınaqlara məruz qaldıq. Mənim mühacirətdəki həyatım ağrılar və əzablarla dolu ən çətin dövrüm oldu. Daha sonra mən Türkiyədə həbs edildim, Azərbaycana ekstradisiya olundum və altı il həbsdə qaldım – bu, həyatımın ən qaranlıq dövrü oldu. Bu müraciətimin məqsədi, sağlamlığımda yaranan geri dönməz problemlər və yaşlı anamın ağır vəziyyəti barədə sizə məlumat verməkdir. Sizdən sağlamlıq problemlərimi, çəkdiyim əzabları və həbsdə keçirdiyim illəri nəzərə alaraq, anamla yenidən birləşməyimə kömək etməyinizi xahiş edirəm", - Hüseyn Abdullayev müraciətində bildirib.

Daha sonra ifadə verən deputat ittihamları rədd edib.

"Mənim bəraət hüququm təmin olunacaqmı? Mən günahsızam. Bütün bunlar yalan, saxtakarlıq və böhtandır. Mən qanunsuz heç nə etməmişəm. Daha nə deyə bilərəm? Mən həmişə dövlətimə sadiq olmuşam. Əlavə edəcək bir sözüm yoxdur", o deyib.

Son sözlə çıxış edən prokuror, Hüseyn Abdullayevin günahının tam sübut olunduğunu bildirib və ona 10 il həbs cəzası verilməsini tələb edib.

İclasın sonunda Hüseyn Abdullayevin anası hakimə müraciət edərək oğluna ədalətli qərar çıxarılmasını xahiş edib.

Növbəti məhkəmə iclası fevralın 13-də keçiriləcək.

N.Təbrizli

www.anews.az

Xəbəri bəyəndiniz?

Sosial şəbəkələrdə paylaş