Naxçıvanda seçkiləri Prezident təyin edəcək

Naxçıvan Muxtar Respublikasının Konstitusiyasına təklif olunan dəyişikliklərə əsasən, bundan sonra Ali Məclisə seçkiləri Azərbaycan Respublikasının Prezidenti təyin edəcək. Bu, indiyədək Ali Məclisin sədrinin səlahiyyətində idi.

Konstitusiyaya iki yeni maddənin (3-1 və 28-1) əlavə edilməsi, 5-ci maddənin isə ləğvi planlaşdırılır. Əlavə ediləcək 3-1-ci maddə ilə Naxçıvanda Prezidentin səlahiyyətli nümayəndəliyinin yaradılması nəzərdə tutulur. Həmin nümayəndəlik Prezidentin təyin etdiyi və birbaşa ona tabe olan şəxsin rəhbərliyi ilə fəaliyyət göstərəcək.

Eyni zamanda, Konstitusiyanın Preambula hissəsində Naxçıvanın Azərbaycanın ayrılmaz hissəsi olması barədə müddəa da öz əksini tapacaq.

Digər bir dəyişikliklə, Ali Məclis 31 deputatın tələbi və ya funksional çətinliklər səbəbilə Azərbaycan Prezidenti tərəfindən buraxıla biləcək. Layihə artıq Naxçıvan Ali Məclisində iki oxunuşdan keçib və Milli Məclisin müzakirəsinə təqdim olunacaq.