Azərbaycan infrastruktur investisiyalarını beynəlxalq layihələrə yönəldəcək

Azərbaycan əsas daxili infrastruktur layihələrinin böyük hissəsini tamamladığından gələcək sərmayələri beynəlxalq nəqliyyat, logistika və elektrik ötürmə şəbəkələrinə yönəltməyi planlaşdırır.
Bunu Prezident İlham Əliyev bildirib.

“Daxili infrastruktura gəldikdə, biz çox yaxşı vəziyyətdəyik. Düşünürəm ki, gələcək çoxmillətli maraqlara xidmət edən infrastrukturdadır”, - Əliyev deyib.

Onun sözlərinə görə, əsas istiqamətlər nəqliyyat və logistika infrastrukturunun genişləndirilməsi, gömrük inzibatçılığının rəqəmsallaşdırılması, yük aşırma prosedurlarının sadələşdirilməsi və yeni elektrik ötürücü xətlərinin yaradılması olacaq.

Prezident bildirib ki, Azərbaycanı Gürcüstan üzərindən Rumıniya ilə birləşdirəcək dörd giqavatlıq Qara dəniz sualtı elektrik kabeli layihəsi texniki-iqtisadi əsaslandırmanın qiymətləndirilməsi mərhələsindədir.

Azərbaycan, Qazaxıstan və Özbəkistan həmçinin Mərkəzi Asiyanın yaşıl elektrik enerjisini Azərbaycan üzərindən Avropaya çatdırmaq üçün Xəzərin dibi ilə sualtı kabel çəkməyi planlaşdırır.

Əliyevin sözlərinə görə, bu layihələr, eləcə də enerji saxlama sistemlərinin yaradılması böyük həcmdə maliyyə tələb edəcək və Azərbaycanın gələcək infrastruktur investisiyalarının əsas sahələrindən olacaq.

Gülnar Nazimqızı