Azərbaycan Ukrayna ilə qaz əməkdaşlığına gedəcəkmi?

Ukrayna Azərbaycana təbii qaz ixracını dəstəkləmək məqsədilə  öz yeraltı qaz anbarlarını istifadəyə təklif edib. Bu barədə Ukraynanın energetika naziri German Qaluşenko Bakıya səfəri zamanı bildirib.

Nazirin sözlərinə görə, Bakı görüşü prezidentlər İlham Əliyev və Volodimir Zelenskinin telefon danışığından sonra razılaşdırılıb.

Tərəflər arasında imzalanan yol xəritəsi Azərbaycan qazının Ukraynaya nəqli və yeraltı qaz anbarlarının beynəlxalq istifadəsi üzrə yeni əməkdaşlıq formatlarını əhatə edir.

Qaluşenko bildirib ki, Azərbaycanın qazı Ukraynanın iri tutumlu yeraltı anbarlarında saxlanıla və uzunmüddətli müqavilələrlə, həm də birja ticarəti vasitəsilə satıla bilər. Bu isə qazın daha yüksək qiymətlərlə realizə olunması imkanını yaradır.

Azərbaycan və Ukrayna arasında bu istiqamətdə ilkin müzakirələr 2025-ci ilin yanvarında Davosda keçirilən  Zelenski–Əliyev görüşündə aparılıb. Həmin vaxtdan bəri tərəflər mümkün marşrutları, o cümlədən Rumıniya üzərindən keçəcək Balkan dəhlizini nəzərdən keçirirlər.

Ukrayna həmçinin Azərbaycanın Avropaya ixrac planlarına dəstək göstərir. Bakı daxili istehlakı azaltmaqla əlavə 10–14 milyard kubmetr qaz ixrac etməyi planlaşdırır.

Ukraynanın özünün də “mavi yanacaq”a tələbatı artır.

2025-ci ilin qışında ölkənin anbarlarındakı ehtiyatlar rekord səviyyədə azalıb.

Rəsmi Kiyev bu səbəbdən istilik mövsümünü vaxtından əvvəl başa vurub və təxminən 1 milyard avroluq qaz idxalı zərurəti ilə üz-üzə qalıb.

Ukrayna 2025-ci ilin əvvəlindən Rusiya qazının Avropa tranzitini dayandırıb.

Bu dəyişiklik fonunda ölkənin sistem təzyiqini saxlamaq üçün texniki qaz tələbi də artıb.

Yeni tərəfdaşlıq formatı çərçivəsində SOCAR-ın iştirakı və Ukraynanın anbar potensialı regional enerji təhlükəsizliyinin gücləndirilməsi baxımından əhəmiyyətli hesab olunur.

N.Təbrizli