Belarus Litva diplomatına etiraz notası təqdim edib

Belarus Xarici İşlər Nazirliyi (XİN) bu gün Litva–Belarus sərhədi boyunca sərhədin birtərəfli bağlanması ilə bağlı olaraq Litva səfirliyi nümayəndəsinə etiraz notası təqdim edib.

Rəsmilərin verdiyi məlumata görə, bu gün Litvanın müvəqqəti işlər vəkili Erikas Vilkanetsas XİN-ə çağırılıb və ona “əvvəlcədən xəbərdarlıq edilmədən həyata keçirilən növbəti birtərəfli sərhəd bağlanması” ilə bağlı etiraz notası çatdırılıb.

Nazirlik bəyan edib ki, Litvanın bu qərarı Belarus, Litva və Avropa İttifaqı vətəndaşlarının hüquqlarına mənfi təsir göstərir və belə bir addım Şengen zonası və bütövlükdə Aİ-nin fundamental dəyəri sayılan hərəkət azadlığı prinsipinə etinasızlıqdır.

"Biz sıravi insanların siyasi konyukturanın əsirinə çevrildiyi bu cür hərəkətlərin xalq əleyhinə olduğunu dilə gətirməyə məcburuq", - XİN-in mətbuat xidmətindən qeyd edilib.

Bəyanatda həmçinin vurğulanır ki, Belarus sərhəd nəzarəti mövzusunda dialoqun və praktik əməkdaşlığın normallaşdırılmasının tərəfdarıdır.