Bu gün ilk iPhone-un yaranmasından 19 il ötür

2007-ci il yanvarın 9-da Apple şirkətinin həmtəsisçisi və baş direktoru Stiv Cobs San-Fransiskoda keçirilən Macworld Konfransı və Sərgisində ilk iPhone-u təqdim edib. Təqdimat sonradan mobil texnologiya bazarında dönüş nöqtəsi kimi qiymətləndirilib.

“Bu gün biz üç inqilabi cihaz təqdim edirik”, – deyən Cobs sensorlu geniş ekranlı iPod, innovativ mobil telefon və internetə çıxışı olan mobil cihazın əslində bir məhsulda birləşdirildiyini açıqlayıb.

iPhone mobil telefon, iPod və veb brauzerin funksiyalarını sensor ekran üzərindən bir araya gətirib. Qurğu fiziki klaviaturadan imtina, çoxtoxunuşlu texnologiya və tam funksional internet brauzeri ilə bazardakı mövcud telefonlardan kəskin şəkildə fərqlənib.

Apple bildirirdi ki, iPhone mobil rabitə və rəqəmsal texnologiyadan istifadə vərdişlərini dəyişmək məqsədi daşıyır. İlk iPhone 29 iyun 2007-ci ildə ABŞ-da satışa çıxarılıb və qiyməti 500–600 dollar arasında olub.

Hazırda isə iPhone-un 17-ci nəsli satışdadır və qiymətlər təxminən 800 dollardan başlayır.

Gülnar