“Dostlarımıza bunu etməməyi tövsiyə edirəm”- Hakan Fidan

Türkiyənin xarici işlər naziri Hakan Fidan Davosda keçirilən Dünya İqtisadi Forumu çərçivəsində “On the Record” proqramında tanınmış jurnalist Hedli Qembla eksklüziv müsahibə verib.

“Qafqazinfo” xəbər verir ki, nazir İranın coğrafi baxımdan böyük və qonşu dövlət olduğunu xatırladaraq, orada baş verənləri Türkiyəni yaxından maraqlandırdığını vurğulayıb.

H. Fidan İranın sabitliyinin bütün region üçün həyati əhəmiyyət kəsb etdiyini qeyd edərək, həm Tehrana, həm də beynəlxalq birliyə problemləri güc tətbiqi ilə deyil, dialoq yolu ilə həll etməyi tövsiyə edib.

Nazir Vaşinqton administrasiyasının gündəmə gətirdiyi “yeni kinetik müdaxilə” ehtimalına toxunaraq, bunun həll yolu olmadığını bildirib:

“Dostlarımıza bunu etməməyi tövsiyə edirəm. Çünki onsuz da İrana çox böyük təzyiq tətbiq olunur. Sanksiyalar İran iqtisadiyyatına ciddi zərər verir və ölkədəki nümayişlər də bununla əlaqəlidir”.

İrandakı etirazlar və müxalifət barədə danışan Fidan qeyd edib ki, beynəlxalq sistemlə yaşanan problemlər səbəbindən Tehranın öz xalqına geniş iqtisadi imkanlar təqdim etməsi çətindir:

“İran müəyyən imkanlar əldə etmək üçün xarici və təhlükəsizlik siyasətində bəzi reformlara getməli olsa da, hakimiyyət dəyişikliyi ehtimalına inanmıram”.

Sonda Hakan Fidan İranın danışıqlara hazır olduğunu, lakin bunun üçün doğru yolun tapılmasının vacibliyini qeyd edib:

“İran özünü küncə sıxılmış hiss etsə, ən pis ssenariyə hazır olacaq. Əgər problemi həll etmək üçün tək bir səmimi niyyət varsa, deməli, ortada bunun üçün fürsət də mövcuddur”