Laqard: Dünya iqtisadiyyatı yeni risklərlə üz-üzədir

Qlobal iqtisadi göstəricilərlə bağlı bəzi proqnozlar gözləniləndən daha nikbin olsa da, dünya iqtisadiyyatı yeni və artan risklərlə qarşı-qarşıyadır. Bu barədə Avropa Mərkəzi Bankının (AMB) prezidenti Kristin Laqard Çinin CGTN televiziya kanalına müsahibəsində bildirib.

Laqardın sözlərinə görə, əsas risklər arasında geosiyasi parçalanma və iqtisadiyyata inamın zəifləməsi ön sıradadır. O qeyd edib ki, rəqəmsallaşma, xüsusilə süni intellektin sürətli inkişafı, iqtisadiyyatın demək olar ki, bütün sektorlarını sürətlə dəyişir.

AMB prezidenti əlavə edib ki, son vaxtlar nisbətən ikinci plana keçsə də, iqlim dəyişikliyi hələ də qlobal iqtisadiyyat üçün ciddi təhlükə olaraq qalır.

Bundan başqa, Laqard hərbi və kibertəhlükəsizliklə bağlı narahatlıqların da artdığını və təhlükəsizlik məsələlərinin bütün sahələrdə daha çox ön plana çıxdığını vurğulayıb.