Hərbi xidmətdən yayınmaya görə rüşvət alanlar həbs edilib - Rəsmi

Azərbaycanda hərbi xidmətdən möhlət hüququnun verilməsi müqabilində rüşvət almaqda təqsirləndirilən 8 vəzifəli şəxs barəsində həbs qətimkan tədbiri seçilib.

Bu barədə Azərbaycan Respublikasının Baş Prokurorluğu və Səfərbərlik və Hərbi Xidmətə Çağırış üzrə Dövlət Xidməti birgə məlumat yayıb.

Məlumata görə, Baş prokuror yanında Korrupsiyaya qarşı Mübarizə Baş İdarəsinin keçirdiyi əməliyyat-axtarış tədbirləri nəticəsində Qaradağ rayon idarəsi, eləcə də Saatlı, Cəbrayıl və Ağdaş rayon şöbələrinin vəzifəli şəxslərinin qanunsuz fəaliyyəti ilə bağlı cinayət işləri başlanıb.

İstintaqla müəyyən edilib ki, həmin şəxslər vətəndaşların hərbi təlim toplanışlarından yayındırılması, hərbi xidmətdən möhlət verilməsi, ölkədən çıxış məhdudiyyətinin tətbiq olunmaması kimi məqsədlərlə müxtəlif məbləğlərdə rüşvət alıblar.

Toplanmış sübutlar əsasında 8 nəfərə Azərbaycan Cinayət Məcəlləsinin 311.3.1, 311.3.2 və 311.3.3-cü maddələri (təkrar, qabaqcadan əlbir olan qrup tərəfindən külli miqdarda rüşvət alma) ilə ittiham irəli sürülüb. Bakı Hərbi Məhkəməsi onların barəsində həbs və vəzifədən kənarlaşdırma qətimkan tədbirləri seçib.

İstintaq tədbirləri davam etdirilir və digər mümkün təqsirli şəxslərin məsuliyyətə cəlb olunacağı istisna edilmir.