Nazirlər Kabineti iclas keçirib

Azərbaycanda su ehtiyatlarının idarə olunması və əsas su anbarlarının iş rejimlərinin optimallaşdırılması məsələsi Su ehtiyatlarından səmərəli istifadə üzrə Komissiyanın 67-ci iclasında müzakirə edilib.

Nazirlər Kabinetinə istinadən verilən məlumata görə, iclas Baş nazirin müavini Şahin Mustafayevin rəhbərliyi ilə keçirilib. Gündəliyə əsasən, gursululuq dövründə ölkənin əsas su anbarlarının iş rejimlərinin tənzimlənməsi və optimallaşdırılması diqqət mərkəzində olub.

Komissiya 2020-ci il 15 aprel tarixli prezident sərəncamı ilə yaradılıb və ölkədə su ehtiyatlarının idarə olunmasının koordinasiyasını həyata keçirir.

İclasda Kür çayı üzərində yerləşən Şəmkir-Yenikənd-Mingəçevir-Varvara, Araz çayı üzərində Araz-Xudafərin-Qız Qalası, eləcə də Samur çayı hövzəsinə daxil olan Taxtakörpü-Ceyranbatan su anbarları sistemlərinin iş rejimləri müzakirə olunub.

Ekologiya və Təbii Sərvətlər Nazirliyinin proqnozlarına istinadən bildirilib ki, cari ilin gursululuq dövründə su ehtiyatlarının ötən illərlə müqayisədə daha yüksək olması gözlənilir.

Kür çayı və onun qollarında – Türyançay, Göyçay, Girdimançay, Qarqarçay və digər ərazilərdə yağıntılar fonunda sululuğun artdığı, bəzi bölgələrdə isə mühafizə bəndlərinə təzyiqin yüksəldiyi qeyd olunub.

Azərbaycan Dövlət Su Ehtiyatları Agentliyi yerli qurumların gücləndirilmiş iş rejimində fəaliyyət göstərdiyini, vəziyyətin nəzarətdə saxlanıldığını və artıq su həcmlərinin Xəzər dənizinə təhlükəsiz şəkildə ötürülməsi üçün tədbirlərin davam etdiyini bildirib.

İclasın sonunda Şahin Mustafayev su ehtiyatlarından səmərəli istifadə, gursululuq dövründə təhlükəsiz su axınının təmin olunması və su anbarlarının iş rejiminə ciddi riayət edilməsi ilə bağlı aidiyyəti qurumlara tapşırıqlar verib.