Tramp Almaniyadakı ABŞ qoşunlarının azaldılmasını nəzərdən keçirir

ABŞ prezidenti Donald Trump Almaniyada yerləşən ABŞ hərbi qüvvələrinin sayının azaldılması imkanının nəzərdən keçirildiyini açıqlayıb. Bu açıqlama İranla bağlı siyasət üzrə Berlinlə fikir ayrılıqları fonunda səsləndirilib.

Tramp sosial mediada yazıb ki, ABŞ Almaniyadakı qoşunlarının sayını azaltmaq variantını araşdırır və bu barədə qərarın yaxın vaxtlarda veriləcəyi gözlənilir.

Bu açıqlama Almaniya kansleri Friedrich Merzin İranla bağlı mövqeyi və Vaşinqtonun strategiyasını tənqid etməsindən sonra verilib. Merz bu həftə İran rəhbərliyinin ABŞ-ı “alçaltdığını” bildirib və ABŞ-ın müharibə strategiyasını şübhə altına alıb.

Tramp isə öz növbəsində NATO-nu münaqişə zamanı ABŞ-a yetərli dəstək verməməkdə ittiham edib.

Çərşənbə günü Merz bildirib ki, Trampla şəxsi münasibətləri “əvvəlki kimi yaxşıdır”, lakin İranla bağlı müharibəyə dair əvvəldən şübhələri olub.

Tramp administrasiyası onun əvvəlki prezidentlik dövründə də Almaniyada yerləşən ABŞ qoşunlarının sayının azaldılmasını gündəmə gətirmiş və Berlinin müdafiə xərclərinin aşağı olduğunu tənqid etmişdi.

Gülnar