Rəqəmsal dezinformasiya risklərinə qarşı təhsilin rolunu artırmalıdır — nazir müavini

Azərbaycanda rəqəmsal mühitin sürətli inkişafı fonunda dezinformasiya, saxta xəbərlər və süni intellektdən sui-istifadə kimi risklərə qarşı mübarizədə təhsil sisteminin rolu artırılmalıdır. Bunu elm və təhsil nazirinin müavini Firudin Qurbanov bildirib.

Onun sözlərinə görə, informasiya-kommunikasiya texnologiyalarının inkişafı media landşaftını dəyişir və ictimai rəyin formalaşmasının ənənəvi mexanizmlərinə təsir göstərir.

“Bu şəraitdə media savadlılığı, informasiya savadlılığı və tənqidi düşüncə bacarıqları xüsusi əhəmiyyət kəsb edir,” Qurbanov forumdakı çıxışında deyib.

Nazir müavini bildirib ki, qlobal informasiya məkanında dezinformasiya, saxta xəbərlər, hibrid təhdidlər və süni intellekt imkanlarından sui-istifadə halları artır.

Onun sözlərinə görə, bu çağırışlar ölkələrin imicinə, ictimai sabitliyə və beynəlxalq təhlükəsizlik mühitinə təsir göstərir.

Qurbanov qeyd edib ki, məktəblərdə və ali təhsil müəssisələrində şagird və tələbələrin rəqəmsal bacarıqlarının artırılması, informasiyanı təhlil etmək, mənbəni yoxlamaq və saxta xəbəri real məlumatdan ayırmaq qabiliyyətinin inkişaf etdirilməsi prioritet olmalıdır.

O bildirib ki, Azərbaycanda internetə çıxış imkanlarının genişlənməsi təhsil sisteminin qarşısında yeni vəzifələr qoyur.

“Bizim məqsədimiz rəqəmsal transformasiyadan yalnız texniki imkan kimi deyil, həm də bilikli, düşünən və məsuliyyətli cəmiyyət quruculuğunun mühüm elementi kimi istifadə etməkdir,” Qurbanov deyib.

Gülnar Nazimqızı