Süni intellektlə hazırlanan saxta videoları aşkar etmək çətinləşib - Murad Balayev

Azərbaycanda dezinformasiya xarakterli saxta videolar əsasən istiqrazlar, bank yatırımları və digər maliyyə çağırışları ilə bağlı yayılır. Bunu Xüsusi Rabitə və İnformasiya Təhlükəsizliyi Dövlət Xidmətinin Kompüter İnsidentlərinə Qarşı Mübarizə Mərkəzinin rəisi Murad Balayev bildirib.

Onun sözlərinə görə, 2024-2025-ci illərdə yayılan saxta videoların hazırlanma keyfiyyətində ciddi artım müşahidə olunub.

“Əvvəllər bu cür videolarda ağız və dodaq hərəkətlərində uyğunsuzluqlar, görüntü keyfiyyətində fərqlər asanlıqla sezilirdi. Lakin müasir dezinformasiya videolarında bunu müəyyən etmək artıq xeyli çətinləşib”, -
Balayev qeyd edib.
O bildirib ki, Azərbaycanda müşahidə olunan bu tip videolar əsasən vətəndaşları maliyyə yatırımlarına, istiqrazlara və bank məhsullarına yönləndirmək məqsədi daşıyır.

Balayevin sözlərinə görə, qlobal miqyasda da dezinformasiya xarakterli hücumların sayı sürətlə artır. O, “Deepstrike” hesabatına istinadla bildirib ki, son illərdə bu tip insidentlərin sayı 500 mindən 8 milyona yüksəlib.

Mərkəz rəisi süni intellektlə hazırlanmış saxta videoların artıq real maliyyə itkilərinə səbəb olduğunu da vurğulayıb. O, Honqkonqda baş vermiş hadisəni nümunə gətirərək bildirib ki, bir Avropa şirkəti saxta video-konfrans vasitəsilə aldadılıb və nəticədə 25 milyon dollar zərərə məruz qalıb.

“Bu, dezinformasiya və süni intellekt texnologiyalarından sui-istifadənin artıq təkcə informasiya təhlükəsizliyi deyil, həm də ciddi iqtisadi təhlükə yaratdığını göstərir”, - Balayev bildirib.

Gülnar Nazimqızı