Süni intellekt phishing hücumlarını gücləndirib, klikləmə faizi 54%-ə çatıb

Süni intellekt texnologiyalarının inkişafı phishing hücumlarını daha peşəkar və çətin aşkarlanan kibertəhdidə çevirib.Bunu Xüsusi Rabitə və İnformasiya Təhlükəsizliyi Dövlət Xidmətinin Kompüter İnsidentlərinə Qarşı Mübarizə Mərkəzinin rəisi Murad Balayev bildirib.

Onun sözlərinə görə, əvvəlki illərdə phishing mesajlarını tərcümə, qrammatika, orfoqrafiya və üslub səhvlərinə görə asanlıqla müəyyən etmək mümkün idi. Lakin müasir dövrdə süni intellekt alətləri bu cür saxta mesajların daha inandırıcı və fərdiləşdirilmiş formada hazırlanmasına imkan verir.

Balayev qeyd edib ki, BrightSight AI və Vectra AI-in 2024–2026-cı illəri əhatə edən statistikasına əsasən, ənənəvi phishing hücumlarında klikləmə faizi 12% olduğu halda, süni intellekt vasitəsilə yaradılan phishing mesajlarında bu göstərici 4,5 dəfə artaraq 54%-ə çatıb.

“Bu, ciddi çağırışdır. Müasir AI əsaslı sosial mühəndislik hücumlarında hədəf şəxs tam analiz olunur. Spearfishing adlandırılan bu hücumlarda şəxsin yazı üslubu, maraqları və davranışları nəzərə alınaraq ona xüsusi kontent hazırlanır. Buna görə də belə hücumların uğur faizi daha yüksək olur,”- Balayev bildirib.

O əlavə edib ki, Mərkəz bu istiqamətdə maarifləndirmə tədbirlərini davam etdirir, canlı yayımlar və seminarlar təşkil edir.

Gülnar Nazimqızı