Azərbaycan IELS-in növbəti tədqiqatına bütün ölkə üzrə qoşulmağı planlaşdırır

Azərbaycan Beynəlxalq Erkən Öyrənmə və Uşaq Rifahı Tədqiqatının (IELS) növbəti mərhələsində bütün ölkə üzrə iştirak etməyi hədəfləyir.
Bunu Təhsil İnstitutunun direktoru səlahiyyətlərini müvəqqəti icra edən Elnur Əliyev anews.az-ın sualını cavablandırarkən bildirib.

“Bu tədqiqatda ilk dəfə iştirak edirdik. Ona görə Bakı və Sumqayıt olmaqla iki şəhərdən qoşulduq. Növbəti tədqiqatda bütün ölkə üzrə iştirak etməyi planlaşdırırıq. Çünki regionlardakı uşaqların nəticələri də maraqlıdır”, - o deyib.

Əliyevin sözlərinə görə, ölkə üzrə daha geniş iştirak Azərbaycanın regionlar üzrə erkən öyrənmə göstəricilərini müqayisə etməyə və uşaqların inkişaf ehtiyaclarını daha dəqiq müəyyənləşdirməyə imkan verəcək.

IELS 2025 İqtisadi Əməkdaşlıq və İnkişaf Təşkilatı tərəfindən uşaqların erkən öyrənmə nəticələri və rifah göstəricilərinin qiymətləndirilməsi məqsədilə aparılır.

Gülnar Nazimqızı