"Keşlə bazarı"nda saxta kürü məhsulları satılır - Rəsmi

Azərbaycan Qida Təhlükəsizliyi Agentliyi (AQTA) saxta və təhlükəli kürü məhsullarının dövriyyəsi ilə bağlı genişmiqyaslı monitorinq keçirib, yoxlamalar nəticəsində minlərlə kiloqram məhsul dövriyyədən çıxarılıb və bir sıra obyektlərdə ciddi pozuntular aşkarlanıb.

AQTA-nın məlumatına görə, monitorinq çərçivəsində 10 ərzaq bazarı, 8 ticarət obyekti, 14 idxalçı anbarı və 61 ictimai iaşə müəssisəsi yoxlanılıb. Nəticədə Bakıdakı “Keşlə Bazarı”, “Özbək Bazarı”, “Sahil Bazarı” və “Yaşıl Bazar” daxil olmaqla bir sıra obyektlərdə etiketsiz, sənədsiz və yararlılıq müddəti bitmiş məhsullar aşkarlanıb.

Qurum bildirib ki, “Keşlə Bazarı”nda təbii farel kürüsü adı altında süni kürü satıldığı, “Özbək Bazarı”nda isə məhsulların etiketsiz qablaşdırmada təqdim edildiyi müəyyən edilib. Eyni zamanda “Natural Fish” obyektində götürülən nümunələrdə Listeria monocytogenes bakteriyası aşkarlanıb.

Yoxlamalar zamanı “Food Fish” şirkətinə məxsus anbarda məhsulların laborator sənədlərsiz satışa çıxarıldığı müəyyən edilib. Bundan başqa, süni kürü istehsalı ilə məşğul olan bir müəssisənin qeydiyyatsız fəaliyyət göstərdiyi bildirilib.

Ümumilikdə 15,3 ton qırmızı kürü və 800 qram qara kürünün sənədsiz olduğu, 678 qram qırmızı və 1,24 ton qara kürünün isə istifadə müddətinin bitdiyi aşkarlanıb. Bütün yararsız məhsullar satışdan çıxarılaraq məhv edilib.

AQTA qeyd edib ki, təbii kürü adı altında süni məhsulların satışı istehlakçıların aldadılması kimi qiymətləndirilir və inzibati məsuliyyət yaradır. Monitorinqlər davam etdirilir.

Gülnar Nazimqızı