İstanbulda itkin düşən azərbaycanlı qadının meyiti tapılıb

İstanbulda Kadıköy–Beşiktaş marşrutu üzrə hərəkət edən sərnişin bərəsində itkin düşən 44 yaşlı Azərbaycan vətəndaşı Məxfurə Hüseynovanın meyiti sahildə tapılıb.Bu barədə “Habertürk” xəbər verir.

Hadisə mayın 2-də axşam saatlarında baş verib.

Məlumata görə, Hüseynova Kadıköydə bərəyə minib, lakin Beşiktaşda bərədən düşdüyünə dair kamera görüntüləri qeydə alınmayıb. Onun çantası bərədə aşkar edilib.

Faktla bağlı aidiyyəti qurumlar tərəfindən genişmiqyaslı axtarış əməliyyatı başlanıb. Bir neçə günlük axtarışlardan sonra qadının meyiti Haydarpaşa sahilləri yaxınlığında tapılıb.

Meyit ölüm səbəbinin müəyyən edilməsi üçün tibbi ekspertizaya göndərilib.

Türkiyə hüquq-mühafizə orqanları hadisənin bədbəxt hadisə və ya intihar olması ehtimalını araşdırır.