İnsan alveri ilə bağlı 198 cinayətin üstü açılıb

Azərbaycanda insan alveri və əlaqəli cinayətlərlə bağlı keçirilən əməliyyat-axtarış tədbirləri nəticəsində 198 cinayət faktı aşkarlanıb. Bu barədə Milli Məclisin İnsan hüquqları, Hüquq siyasəti və dövlət quruculuğu komitələrinin bugünkü birgə iclasında müzakirə olunan insan alverinə qarşı mübarizə üzrə Milli Koordinatorun illik məlumatında öz əksini tapıb.

Məlumata görə, aşkarlanan faktların 152-si insan alveri, 45-i isə insan alveri məqsədilə sənədlərlə qanunsuz hərəkətlərlə bağlı olub. Qeyd edilir ki, cinayətlərin 57-si informasiya texnologiyalarından istifadə edilməklə törədilib.

Rəsmi məlumatda insan alveri cinayətlərinin 97%-nin açıldığı bildirilib. Əməliyyat tədbirləri nəticəsində 6 şəxs ətrafında araşdırma aparılıb və 2 cinayətkar qrup zərərsizləşdirilib.
Hüquq-mühafizə orqanları tərəfindən həmin əməllərlə bağlı 10 cinayət işi başlanıb. Bildirilib ki, bir cinayət işi çərçivəsində 20-yə yaxın fakt üzrə istintaq aparılıb.

İstintaq çərçivəsində 8 cinayət işi üzrə 10 nəfər, o cümlədən 9 qadın təqsirləndirilən şəxs qismində cəlb olunub. Ümumilikdə 12 nəfər, onların da 11-i qadın olmaqla məhkəmə məsuliyyətinə verilib.

Gülnar Nazimqızı