Sosial şəbəkələrdə yoxlanmamış məlumatların yayılması ciddi narahatlıq doğurur- Natiq Məmmədli

Sosial şəbəkələrdə yoxlanmamış məlumatların yayılması və dezinformasiya axını ciddi narahatlıq doğurur. Bunu MEDİA-nın icraçı direktor müavini Natiq Məmmədli bildirib. 

Onun sözlərinə görə, ölkənin informasiya mühitini çirkləndirmək istəyən müxtəlif qüvvələr var.

 “Jurnalistin peşəkarlıq səviyyəsi o qədər yüksək olmalıdır ki, ölkəsinin maraqlarını peşəkarlıq prinsipləri ilə uzlaşdıra bilsin”,- o bildirib.

Məmmədli vurğulayıb ki, media etikasının əsas prinsipi həqiqətə xidmət etməkdir.

 “Azərbaycan dövləti bu gün bəyan edir ki, regionda sülhün müəllifidir. Bu, kifayət qədər dəqiq fikirdir və həqiqətdir. Sülhü təbliğ etmək sadəcə şüar səsləndirmək deyil. Burada söz və əməl birliyi olmalıdır. Dövlət liderlərinin sülh çağırışları onların real davranışları və geosiyasi mövqeləri ilə üst-üstə düşməlidir”, — Natiq Məmmədli əlavə edib.

Gülnar Nazimqızı