Bakı-Ələt yolunda çökmə baş verib, hərəkət məhdudlaşdırılıb

Bakı–Ələt–Qazax–Gürcüstan dövlət sərhədi avtomobil yolunun Bakı istiqamətində yerləşən 55-ci kilometrliyindəki kanal körpüsündə çökmə baş verib.

Azərbaycan Avtomobil Yolları Dövlət Agentliyindən (AAYDA) bildirilib ki, körpünün aşırım tirlərindən birinin qırılması nəticəsində çökmə yaranıb.

Məlumata görə, hadisə yerinə agentliyin əməkdaşları cəlb olunub və təhlükəsizlik tədbirləri görülüb.

Hazırda magistralın 54-cü kilometrindən 56-cı kilometrinədək Bakı istiqamətində nəqliyyatın hərəkəti məhdudlaşdırılıb. Avtomobillər alternativ olaraq qəsəbədaxili yan yola yönləndirilir.

AAYDA bildirib ki, hadisənin səbəbləri araşdırılır, dəymiş zərərin həcmi müəyyənləşdirilir və yaxın vaxtlarda bərpa işlərinə başlanılacaq.