Azərbaycanda 270 min hektardan çox ərazi minalardan təmizlənib

2020-ci ilin noyabrından bu günə qədər Azərbaycanın işğaldan azad edilmiş ərazilərində 270 mindən çox hektar sahə mina və partlamamış hərbi sursatlardan təmizlənib, 250 mindən artıq mina və partlamamış hərbi sursat aşkarlanaraq zərərsizləşdirilib. Bunu WUF13 çərçivəsində keçirilən “Münaqişədən Sonrakı Şəhər Yenidənqurması: Humanitar Mina Təmizləmə Fəaliyyətinin Həlledici Rolu” adlı tədbirdə ANAMA sədri Vüqar Süleymanov məlumat verib.

O bildirib ki, minatəmizləmə fəaliyyəti yalnız insan həyatının qorunmasına yönəlmiş humanitar tədbir deyil, eyni zamanda yenidənqurma və bərpa proseslərinin əsas dayaqlarından biridir. Onun sözlərinə görə, yaşayış məntəqələrinin yenidən qurulması, infrastruktur layihələrinin həyata keçirilməsi, kənd təsərrüfatının inkişafı, nəqliyyat şəbəkələrinin genişləndirilməsi və iqtisadi fəallığın artırılması üçün ilk növbədə təhlükəsiz mühit formalaşdırılmalıdır.

ANAMA sədri vurğulayıb ki, mina təhlükəsi yalnız Azərbaycana xas problem deyil və dünyanın müxtəlif bölgələrində münaqişədən sonrakı bərpa proseslərinə ciddi maneələr yaradır. O bildirib ki, bu təhlükə inkişaf imkanlarını məhdudlaşdırır, əhalinin təhlükəsizliyini risk altında saxlayır və beynəlxalq əməkdaşlığın vacibliyini artırır.

Aytac