Laçında növbəti əmək yarmarkası keçirilib

Laçın rayonunda növbəti əmək yarmarkası keçirilib.

Əmək və Əhalinin Sosial Müdafiəsi Nazirliyindən verilən məlumata görə, tədbirdə çıxış edən Dövlət Məşğulluq Agentliyinin İdarə Heyətinin sədri Hasil Abbasov işğaldan azad edilmiş ərazilərə Böyük Qayıdış proqramı çərçivəsində köçürülən və köçürülməsi nəzərdə tutulan vətəndaşların məşğulluğunun təmin olunması istiqamətində görülən işlərdən danışıb.

Məlumata əsasən, işğaldan azad edilmiş ərazilərdə indiyədək işəgötürənlərlə əməkdaşlıq çərçivəsində 36 əmək yarmarkası təşkil olunub.

Yarmarkada 21 müəssisə tərəfindən informasiya texnologiyaları üzrə mühəndis, rabitə mühəndisi, elektrik-qaz qaynaqçısı, ofisiant, yük avtomobili sürücüsü, qənnadıçı, fəhlə, dəmirçi, gözətçi və digər ixtisaslar üzrə ümumilikdə 90-a yaxın vakansiya təqdim edilib.

Tədbirdə iştirak edən işsiz və işaxtaran şəxslərə vakansiyalar barədə məlumat verilib, uyğun namizədlərin qeydiyyatı aparılıb. Həmçinin, vətəndaşlara Dövlət Məşğulluq Agentliyinin aktiv məşğulluq proqramları və layihələri barədə məlumat təqdim olunub.

Nazirlik bildirib ki, Qarabağ Peşə Hazırlığı Mərkəzi də tədbirdə stendlə təmsil olunub, iştirakçılara mərkəzin fəaliyyəti, kurslar və müraciət qaydaları barədə məlumat verilib.