FHN əhaliyə xəbərdarlıq etdi

Azərbaycanın Fövqəladə Hallar Nazirliyi ölkənin bəzi bölgələrində müşahidə olunan qeyri-sabit hava şəraiti ilə əlaqədar əhaliyə xəbərdarlıq edib.

Nazirliyin yaydığı məlumata görə, hazırda ayrı-ayrı rayonlarda yağıntılı hava şəraiti müşahidə olunur, bəzi dağ çaylarından sel keçir. Yaxın günlərdə yağışlı və küləkli havanın davam edəcəyi proqnozlaşdırılır.

FHN vətəndaşlara sel və daşqın təhlükəsi olan ərazilərdən uzaq durmağı, belə hallarla qarşılaşdıqda isə dərhal yüksək ərazilərə keçməyi tövsiyə edib.

Nazirlik həmçinin ildırım təhlükəsi ilə bağlı xəbərdarlıq edərək bildirib ki, ildırım zamanı elektrik cihazları şəbəkədən ayrılmalı, telefonla danışılmamalı, açıq ərazilərdə elektrik xətləri, antenalar və hündür ağacların yaxınlığında dayanılmamalıdır. Avtomobildə olan şəxslərə isə hərəkəti dayandıraraq şüşələri qaldırıb təhlükənin keçməsini gözləmək tövsiyə olunub.

Məlumatda qeyd olunub ki, güclü külək zamanı yüngül konstruksiyalı tikililərdən, reklam lövhələrindən, elektrik dirəkləri və naqillərindən uzaq durmaq lazımdır.

FHN əlavə edib ki, küləkli hava yanğınların söndürülməsini çətinləşdirə biləcəyindən yanğın təhlükəsizliyi qaydalarına ciddi əməl olunmalıdır. Kiçikhəcmli gəmi istifadəçilərinə isə belə hava şəraitində dənizə çıxmağın qadağan olunduğu xatırladılıb.

Nazirlik vətəndaşları təhlükə yaranacağı təqdirdə 112 qaynar xəttinə müraciət etməyə çağırıb.