Prezident buğdanın istehsal dinamikasından narazıdır

Son illərdə Azərbaycanda kənd təsərrüfatının inkişafında müşahidə olunan durğunluq hökuməti narahat edir və bu sahə üzrə yeni Dövlət Proqramı hazırlanaraq qəbul ediləcək. Bunu Prezident İlham Əliyev bildirib. 

Prezidentin sözlərinə görə, proqram həm yerli, həm də xarici investorlar üçün mesaj xarakteri daşıyır və özəl sektorun kənd təsərrüfatının inkişafında rolu artırılmalıdır.

“Biz həm güzəştli kreditlərdən, həm də digər mexanizmlərdən istifadə etməliyik ki, Azərbaycan sahibkarlarının kənd təsərrüfatına daha böyük həcmdə sərmayə qoymasına nail olaq”, - Əliyev deyib.

O qeyd edib ki, hökumət eyni zamanda xarici investorları da kənd təsərrüfatı sektoruna cəlb etməyə çalışır.

Prezident bildirib ki, ölkədə buğda üzrə özünütəminetmə səviyyəsi hazırda 55% təşkil edir və bu göstərici uzun illərdir artmır.

“Bu, qəbuledilməz rəqəmdir və mütləq artmalıdır”, - Əliyev vurğulayıb.

Onun sözlərinə görə, Azərbaycanda daxili buğda istehsalı 1 milyon 573 min ton, idxal isə 1 milyon 267 min ton təşkil edir.

Prezident qeyd edib ki, aqroparkların yaradılması kənd təsərrüfatının inkişafında mühüm rol oynasa da, buğda istehsalı üzrə göstəricilər hələ də istənilən səviyyəyə çatmayıb.

Gülnar Nazimqızı