Zaur Mikayılov: Əkin strukturu mövcud su ehtiyatlarına uyğunlaşdırılmalıdır

Azərbaycanda qarşıda duran əsas çağırışlardan biri mövcud su ehtiyatlarına uyğun əkin strukturunun formalaşdırılmasıdır. Bu barədə Dövlət Su Ehtiyatları Agentliyinin sədri Zaur Mikayılov Prezidentin keçirdiyi müşavirədə deyib. 

Onun sözlərinə görə, iqlim dəyişiklikləri fonunda su ehtiyatları və yağıntıların həcmi illər üzrə dəyişdiyi üçün hər region üzrə illik su balansı hesablanmalı və hansı bitkilərin əkiləcəyi buna uyğun müəyyən edilməlidir.

Mikayılov qeyd edib ki, Kənd Təsərrüfatı Nazirliyinin 2026–2030-cu illər üzrə tədbirlər planında buğda və pambıq üzrə orta məhsuldarlığın 50 sentnerə çatdırılması hədəfi mövcud ekstensiv suvarma sistemlərindən müasir intensiv suvarma metodlarına keçidi zəruri edir.

Onun sözlərinə görə, tədbirlər planında intensiv bağların sahəsinin 50 min hektardan 70 min hektara, istixanaların isə 1500 hektardan 2000 hektara çatdırılması nəzərdə tutulur.

Mikayılov əlavə edib ki, pambıq əkin sahələrinin 100 min hektardan 85 min hektara endirilməsi fonunda məhsuldarlığın 17% artırılması və ümumi istehsalın 425 min tona çatdırılması hədəfləri də təqdirəlayiq hesab olunur.

Agentlik sədri bildirib ki, Qəbələ və Salyan rayonlarında 20 min hektar sahənin konsolidasiyası və həmin ərazilərdə təsərrüfatdaxili suvarma şəbəkələrinin qurulması planlaşdırılır.

O həmçinin qeyd edib ki, ölkə üzrə müasir suvarma texnikalarının əhatə dairəsinin 130 min hektardan 300 min hektara qədər artırılması su ehtiyatlarından dayanıqlı istifadə baxımından mühüm addım olacaq.

Gülnar