Deputat uşaqların gözü qarşısında heyvan kəsiminə irad bildirib

Uşaqların heyvan kəsimi prosesinə cəlb olunması və bu səhnələri izləməsi psixoloji baxımdan düzgün deyil və məişət zorakılığının formalaşmasına təsir göstərə bilər. Bunu deputat Qüdrət Həsənquliyev deyib. 

Deputat qeyd edib ki, bəzi valideynlər uşaqları qurban kəsimi mərasimlərinə aparır, onların gözü qarşısında heyvan kəsilir və hətta uşaqların alnına qan sürtülür.

“Bu doğru deyil. Məişət zorakılığı elə uşaqların qabağında heyvan kəsilməsindən başlayır. Biz uşaqları qorumalıyıq", - Həsənquliyev deyib.

O əlavə edib ki, Azərbaycanda evliliklərin və doğum sayının azalması, boşanmaların və selektiv abortların artması da ciddi narahatlıq doğurur.

Deputatın sözlərinə görə, selektiv abortlarla mübarizə aparmaq üçün ilk növbədə bu halların səbəbləri araşdırılmalıdır.

Gülnar Nazimqızı