Azərbaycan büdcəsində neft gəlirlərinin payını 30%-ə endirəcək - nazir

Azərbaycan 2030-cu ilin sonunadək dövlət büdcəsi gəlirlərində neft gəlirlərinin payını 30%-ə endirməyi, gəlirlərin 70%-ni isə qeyri-neft sektorundan təmin etməyi planlaşdırır. Bunu maliyyə naziri Sahil Babayev bildirib.

“2030-cu ilin sonuna məqsədimiz Azərbaycanın dövlət büdcəsi gəlirlərinin neftdən asılılığını 30%-ə endirmək, gəlirlərin 70%-ni isə qeyri-neft sektorundan təmin etməkdir”, - nazir deyib.

Bu məqsədlə hökumət növbəti üç ildə Dövlət Neft Fondundan dövlət büdcəsinə transfertləri daha 20% azaltmağı planlaşdırır.

Babayevin sözlərinə görə, transfertlər son iki ildə artıq təxminən 20% azaldılıb.

Nazir həmçinin bildirib ki, büdcənin qeyri-neft ilkin kəsirinin ÜDM-ə nisbətinin 2026-cı ilin sonunda gözlənilən 17%-dən 2030-cu ilədək 12%-ə endirilməsi hədəflənir. Bu göstərici əvvəlki illərdə 22–23% təşkil edib.

Babayevin sözlərinə görə, Azərbaycanın ümumi dövlət borcu ÜDM-in təxminən 17%-nə, xarici dövlət borcu isə 6%-nə bərabərdir.

Ölkənin strateji ehtiyatları xarici dövlət borcunu təxminən 20 dəfə üstələyir.

Babayev bildirib ki, son altı ildə işğaldan azad edilmiş ərazilərin yenidən qurulmasına 25 milyard manat vəsait ayrılıb. Bu vəsait hesabına yol, su, enerji, yaşayış və sosial infrastruktur layihələri həyata keçirilib.

Onun sözlərinə görə, bununla yanaşı, 2021–2026-cı illərdə ölkənin digər ərazilərində infrastrukturun yenilənməsinə yönəlmiş layihələrə 16 milyard manat sərf olunub.



Gülnar Nazimqızı