FHN qeyri-sabit hava şəraiti ilə əlaqədar əhaliyə müraciət edib

Milli Hidrometeorologiya Xidmətinin məlumatına görə, yaxın günlərdə Azərbaycanın bəzi ərazilərində güclü külək, intensiv yağış və şimşək gözlənilir, bəzi dağ çaylarından isə qısamüddətli sel keçəcəyi proqnozlaşdırılır.

Fövqəladə Hallar Nazirliyi (FHN) hava şəraiti ilə əlaqədar əhaliyə təhlükəsizlik qaydalarına riayət etməyə çağırıb.

Nazirlikdən verilən məlumata görə, güclü külək zamanı vətəndaşlara yüngül konstruksiyalı tikililərdən, bina və reklam lövhələrindən uzaq durmaq, həmçinin elektrik xətləri və hündür ağacların altında dayanmamaq tövsiyə olunur.

FHN bildirib ki, küləkli hava yanğınların söndürülməsini çətinləşdirə biləcəyindən yanğın təhlükəsizliyi qaydalarına xüsusi diqqət yetirilməlidir. Kiçikhəcmli gəmi istifadəçilərinə də belə hava şəraitində dənizə çıxmamaq tövsiyə olunub.

Nazirlik intensiv yağıntılar nəticəsində yarana biləcək sel və daşqın riski ilə əlaqədar təhlükəli ərazilərdən uzaq durmağı, təhlükə yaranacağı təqdirdə isə yaxınlıqdakı yüksəkliklərə çəkilməyi məsləhət görüb.

FHN həmçinin ildırım təhlükəsi zamanı elektrik cihazlarının şəbəkədən ayrılmasını, açıq havada elektrik xətləri və antenalara yaxınlaşmamağı, hündür ağacların altında sığınmamağı tövsiyə edib. Avtomobildə olan şəxslərə isə hərəkəti dayandıraraq şüşələri qaldırıb təhlükə sovuşanadək gözləmələri məsləhət görülüb.