Qazaxıstan BTC ilə neft nəqlini ildə 2,2 milyon tona qədər artırmağa hazırdır

Qazaxıstan Bakı–Tbilisi–Ceyhan (BTC) neft kəməri ilə neft nəqlini hazırkı 1,5 milyon tondan ildə 2,2 milyon tona qədər artırmağa hazırdır. Bunu Qazaxıstanın energetika naziri Yerlan Akkenjenov jurnalistlərə açıqlamasında bildirib.

Nazirin sözlərinə görə, Qazaxıstan neft ixracı üçün mövcud olan bütün marşrutları nəzərdən keçirir, lakin Bakı–Supsa marşrutu ilə bağlı hələlik rəsmi danışıqlar aparılmayıb.

“İldə 1,5 milyon ton həcm planlaşdırılıb. Biz bu həcmləri artırmağa hazırıq”, – Akkenjenov Bakı Enerji Həftəsi çərçivəsində jurnalistlərə bildirib.

BTC ilə nəqlin hansı həddə qədər artırıla biləcəyi ilə bağlı suala cavab verən nazir bildirib ki, mövcud protokollarda nəzərdə tutulan 2,2 milyon tona qədər artım mümkündür.

“Protokolda nəzərdə tutulan 2,2 milyon tona qədər və daha çox artıra bilərik, – o deyib.

Akkenjenov əlavə edib ki, Aktau limanı vasitəsilə BTC istiqamətində ildə 7 milyon tona qədər neft daşınması üçün texniki imkan mövcuddur.

Nazir “Drujba” neft kəməri ilə bağlı vəziyyətə də toxunaraq bildirib ki, mövcud məhdudiyyətlər Qazaxıstandan asılı olmayan texniki səbəblərlə bağlıdır.

“Qazaxıstan texniki baxımdan nefti nəql etməyə hazırdır. Hər şey tərəfdaşlarımızdan asılıdır”, – Akkenjenov qeyd edib.

Onun sözlərinə görə, problemlər əsasən Almaniyanın Rostok limanının infrastruktur imkanları ilə əlaqədardır.

Nazir həmçinin bildirib ki, Qazaxıstan mayda neft hasilatı üzrə planı tam yerinə yetirib və nəzərdə tutulan göstəricilərə nail olub.

N.Təbrizli