SOCAR Cənubi Qafqaz Boru Kəmərinin genişləndirilməsini müzakirə edir

Azərbaycan Avropaya daha çox qaz ixrac etmək üçün Cənubi Qafqaz Boru Kəmərinin (SCP) genişləndirilməsini müzakirə edir, lakin bunun üçün Avropa tərəfdən uzunmüddətli qaz alış müqavilələri və maliyyə dəstəyi tələb olunur. Bunu SOCAR prezidenti Rövşən Nəcəf Bakı Enerji Həftəsi çərçivəsində bildirib.

Nəcəfin sözlərinə görə, Azərbaycan qazının ixrac coğrafiyası artıq Avropa, Gürcüstan və Türkiyə ilə yanaşı Asiya bazarlarını da əhatə edir.

“Biz daha çox qaz tədarük etməyə və infrastrukturu genişləndirməyə hazırıq, lakin bunun üçün Avropa tərəfdən öhdəliklər və uzunmüddətli müqavilələr lazımdır”, - o deyib.

SOCAR rəhbəri bildirib ki, Azərbaycanın qaz hasilatının artırılmasına yönəlmiş əsas layihələr sırasında Sah Deniz Compression, Babək yatağı, Abşeron yatağının tammiqyaslı işlənməsi və digər qaz layihələri yer alır.

Onun sözlərinə görə, Azəri-Çıraq-Günəşli yatağında ilk sərbəst qaz hasilatına başlanması da əlavə qaz həcmlərinin bazara çıxarılmasına imkan verəcək.

Nəcəf qeyd edib ki, süni intellekt, məlumat mərkəzləri və enerji təhlükəsizliyi ilə bağlı narahatlıqlar gələcəkdə qaza tələbatı artıracaq.

SOCAR həmçinin xaricdə hasilat layihələrinə investisiyalarını genişləndirir. Şirkət Tailandda Valeura layihəsində 10% paya malikdir və BƏƏ-də Sarb Lulu layihəsində iştirak edir.

N.Təbrizli