25 azərbaycanlının olduğu iki xarici yük gəmisinə dron hücumu oldu -5 nəfər ölüb- RƏSMİ

Bu gün gecə saatlarında heyətində ümumilikdə 25 nəfər Azərbaycan vətəndaşının olduğu iki xarici yük gəmisinə dron hücumları həyata keçirilib.

Bu barədə Xarici İşlər Nazirliyinin Mətbuat xidməti idarəsinin rəisi Ayxan Hacızadə sorğumuza  cavab olaraq deyib.

O bildirib ki, sözügedən gəmilər Azərbaycan dövlətinə məxsus deyil.

“Hücum nəticəsində ümumilikdə 5 nəfər vətəndaşımızın həlak olduğu, 3 nəfərin isə yaralandığı barədə Rusiya tərəfindən müvafiq məlumat daxil olub. Yaralılar Yeysk şəhər xəstəxanasına yerləşdiriliblər.

Hal-hazırda, məsələ ilə bağlı Xarici İşlər Nazirliyi tərəfindən aidiyyəti dövlət qurumlarımız, ölkəmizin diplomatik nümayəndəlikləri, habelə müvafiq ölkələrin səlahiyyətli qurumları ilə əlaqələndirmə işləri həyata keçirilir. Rusiyadakı səfirliyimizin bir neçə nəfər əməkdaşı hadisə yerinə yola düşüblər. Vətəndaşlarımızın vəziyyəti, onların ölkəyə qaytarılması və zəruri konsulluq dəstəyinin göstərilməsi məsələləri diqqətdə saxlanılır.

Həlak olanların ailələrinə və yaxınlarına dərin hüznlə başsağlığı verir, yaralananların tezliklə şəfa tapmasını arzulayırıq”, - Xarici İşlər Nazirliyinin rəsmisi qeyd edib.

Qeyd edək ki, 5 iyun tarixində gecə saatlarında Azov dənizinin Taqanroq körfəzində “Natra” və “Zirkon” yük gəmiləri pilotsuz uçuş aparatlarının hücumuna məruz qalıb.

***

2026-cı il iyunun 5-nə keçən gecə Azov dənizinin Taqanroq körfəzində pilotsuz uçuş aparatları iki yük gəmisinə - Türkiyədən Rostov-na-Donuya taxıl yükləmək üçün ballast vəziyyətində hərəkət edən “Natra” və “Zirkon” теплоходlarına hücum etdiyi iddia edilir. Bu barədə Tamansk Dəniz Xilasetmə-Koordinasiya Mərkəzinin operativ məlumat yayıb.

Məlumata görə, hücumlar nəticəsində beş nəfər vəfat edib.

Qeyd olunub ki, “Natra” gəmisinə dörd PUA zərbəsi endirilib. Ekipajın iki üzvü həlak olub, baş vermiş yanğın ekipaj tərəfindən söndürülüb. Gəmi suyun üzərində qalsa da, yedəyə alınmasına ehtiyac var.

“Zirkon” gəmisində isə üst tikili hissəsinə dörd zərbə qeydə alınıb. Üç ekipaj üzvü ölüb, sağ qalan heyət xilasedici qayıqlarla gəmini tərk edib. Hazırda gəmi yanaraq məhv olur.

Beliz bayrağı altında üzən “Natra” gəmisində 12 nəfər, Palau bayrağı altında üzən “Zirkon” gəmisində isə 14 nəfər olub. Onların hamısı fərdi qaydada işə götürülmüş Azərbaycan vətəndaşları olub. Hər iki gəmi xarici bayraq altında fəaliyyət göstərib və Azərbaycan dövlətinə aid olmayıb.

 Sağ qalan dənizçilər hadisə ərazisindən keçən üç gəmi tərəfindən xilas ediliblər. Səhər saatlarına yaxın onların hamısı Yeysk limanına çatdırılıb. Suyun üzərində qalan zədələnmiş “Natra” gəmisini yedəyə almaq üçün isə iki yedək gəmisi bölgəyə göndərilib.

Məsələ ilə bağlı Xarici İşlər nazirliyinə sorğu göndərilib.